de actualidade
foto Kim Jong-un
 
Votacion: 
No hay votos
Gastronomía | Galicia 0

José María Fonseca: "O viño non está de moda; antes bebíase máis"

Economista, intelectual, músico e dono de Terras Gauda, unha das adegas máis importantes de Galicia. Un home polifacético por definición

José María Fonseca Moretón (Ourense, 1950). PEPE FERRÍN (AGN)

José María Fonseca Moretón (Ourense, 1950). PEPE FERRÍN (AGN)

Como vai a vendima este ano?

Veu algo anticipada pero apunta moi ben. Estamos na primeira semana e a uva está entrando sanísima, moi equilibrada en acidez e de azúcar, polo que creo que teremos un viño moi bo este ano.

Está de moda o viño?

O viño leva de moda 2.000 anos (ri). Cre que a xente entende tanto como parece ou hai certo postureo? As dúas cousas son verdade. Hai entendidos pero tamén un compoñente de postureo, algo que se estende a outras cousas que entran polos sentidos, como a arte. Préstanse porque permiten expresar sensacións con palabras técnicas e iso sempre chama.

Quen si é un recoñecido experto en viño é o rei emérito Juan Carlos. E dixo que Terras Gauda é un dos seus caldos preferidos. Éncheo iso de orgullo?

De orgullo e satisfacción (ri). Coa letra pequena podo dicir que el foi un dos maiores embaixadores de Terras Gauda e axudounos moito a consolidar o mercado en Baleares, onde temos moitísimo público. Persoalmente mandoume alabanzas para Terras Gauda.

"Ao rei Juan Carlos gústalle Terras Gauda e fixo de embaixador do noso viño en Baleares, onde agora vendemos moito"

Que levou a un funcionario do Inem con soldo fixo coma vostede a aventurarse no mundo do viño?

A pregunta fíxenma eu moitas veces, sobre todo nos comezos, que non foron doados. Moitas veces pensei por que me metería eu nisto, pero se volvese atrás repetiría o mesmo. En canto ao meu posto de funcionario, pedín unha excedencia. Xubileime hai non moito.

Como cambiaron os tempos no ámbito do viño?

Antes en España bebíase moito máis viño que o que se bebe agora. Hai non máis de 50 anos bebíanse 72 litros por habitante cada ano, hoxe andamos nos 20.

Que influíu neste descenso?

Dígoo con crudeza: o papanatismo. España é o país con máis extensión de viñedo do mundo, cunha enorme riqueza vitícola e con caldos recoñecidos en todo o planeta como os de Xerez. O baixo consumo de viño coincide cos maiores consumos de destilados, que non teñen nada que ver cos fermentados desde o punto de vista da saúde, e os poderes públicos permanecen totalmente insensibles ante esta situación. Pero estas viaxes sempre son de ida e volta.

É vostede un home polifacético: economista, empresario, intelectual... Como se definiría?

Non vou definirme a min mesmo como intelectual. Empresario son e economista tamén porque acabei a carreira. Pero seguramente son máis saxofonista que economista (ri).

É certo! Tamén é músico. Mesmo formou parte do grupo folk A Roda.

En A Roda estiven catro ou cinco anos e gravei algunhas actuacións en televisión pero ningún disco. En cambio si aparezo no primeiro que gravou a tuna de Santiago. Toco, amais do saxo, a gaita e a guitarra.

"No grupo A Roda estiven catro ou cinco anos e gravei algunhas actuacións en televisión pero ningún disco"

E como se compatibilizan tantas actividades?

Hai que rir moito.

É vostede amante da música tradicional galega. Como ve o panorama actual?

Eu creo que está mellor que nunca. Cando eu era mozo pensabamos que as gaitas e as bandas de música desaparecerían, pero tiveron relevo e foron a mellor. A música folk conectou con outras músicas celtas e iso alimentouna. Galicia nunca estivo tan ben, non só na música. E o que diga o contrario é que non coñeceu o pasado.

Ten sona de ser apegado á terra.

Como non o vou estar! Nacín en Ourense, estudiei en Santiago, teño a adega no Rosal e os meus fillos naceron en Vigo.

Tamén din de vostede que é un gran conversador. Impresionouno algún intelectual?

Moitos. Pero se teño que nomear algún direi Carlos Casares. Ademais de que estamos no ano no que se lle adicou o Día das Letras Galegas, era íntimo amigo meu Con Carlos tiña unhas tertulias marabillosas que se alargaban ata o amencer. Na miña vida vin un conversador coma el.

Maridan viño e literatura?

Levan toda a vida maridando!

"O minfundismo é un mal endémico do país pero que vén determinado en parte pola dispersión da poboación"

Viste sempre paxariña. É para diferenciarse da xente clónica?

Gústame máis que a gravata. É verdade que as formas hai que coidalas pero parece que todas as cabezas pensantes van en uniforme de colexio con traxes iguais.

Pasa o futuro do viño por abrirse a novos mercados?

Sen dúbida. Estamos nun mundo global e non podemos nin debemos escapar del.

Teño entendido que diversificou o seu negocio con outras empresas mesmo fóra de Galicia.

Si. Hai que estar vivos e poñer máis pés ao banco. Esto levounos no seu día a entrar en Pittacum e Quinta Sardonia, dúas adegas de tintos de Castela e León. O día que estés quieto a empresa morre.

¿Condiciona o minifundismo a produción de viño en Galicia?

Si, completamente. É un mal endémico do país pero que vén determinado en parte pola dispersión da poboación.

Seguimos os galegos a ter unha mentalidade minifundista?

Desgraciadamente, si. Aínda que pouco a pouco se vai superando.

Cal é a receta do seu éxito?

Fundei Terras Gauda en 1989, nun momento moi importante para o mercado do viño. Acertamos coas cousas que fixemos no seu día, porque creo que lle demos a dimensión axeitada e reunimos as vontades necesarias para que as cousas saíran. Tamén tivemos unha chisca de sorte e, sobre todo, traballo, traballo e traballo.

¿Ve continuidade na súa familia en Terras Gauda?

Si, e dáme moita satisfacción, porque vexo que os meus fillos son serios, sólidos e traballadores e teñen unha relación espléndida co resto do equipo da adega.

Comentarios

fotoOs comentarios enviados fóra do horario de moderación, serán aprobados ao día seguinte

Serán borrados os comentarios que conteñan insultos e/ou contados inadecuados Para calquera dúbida, consulta a guía de comentarios.