O documental 'Desenterrando Sad Hill', do vigués Guillermo de Oliveira, estréase este venres no cine
O filme conta a recuperación do cemiterio creado na provincia de Burgos para a escena final de 'El bueno, el feo y el malo'
O documental Desenterrando Sad Hill, do vigués Guillermo de Oliveira, no que se conta a recuperación do cemiterio creado na provincia de Burgos para a escena final da película El bueno, el feo y el malo, estréase en cinemas este venres.
En outubro de 2015, un reducido grupo de fans da película de Sergio Leone, acoden á localización da escena final da película en Burgos. Case 50 anos despois da rodaxe, pretenden desenterrar e devolver o esplendor do mítico cemiterio de Sad Hill.
Así, Guillermo de Oliveira explora as motivacións das persoas que levan a cabo este esforzo. O documental conta coas declaracións de lendas do filme de 1966 como Clint Eastwood e Ennio Morricone, xunto a recoñecidos fans da película como o líder de Metallica, James Hetfield, así como Álex de la Iglesia e Joe Dante.
A escena final de El bueno, el feo y el malo é unha das máis aplaudidas da historia do cinema. A música de El éxtasis del oro de Ennio Morricone acompaña ao trío protagonista na secuencia do cemiterio de Sad Hill, un mítico emprazamento que quedou abandonado á súa sorte e foise deteriorando co paso do tempo.
Esta produción de Zapruder Pictures e Sadhill Desenterrado AIE púidose ver recentemente no Almería Western Filme Festival.