O milagre exprés de Rueda
Tal día como hoxe, hai dous anos, Alfonso Rueda os seus primeiros pasos como presidente de Galicia. Non pasaran nin 24 horas da súa investidura no Parlamento, nunha sesión na que a maioría absoluta do PPdeG disipou calquera factor sorpresa, pero non a incerteza que rodeaba o novo escenario político. A do propio PPdeG, inquedo de portas cara adentro sen a rede de seguridade que representara Feijóo durante anos; e a da oposición, forzada a cambiar boa parte da súa estratexia política e electoral.
A saída repentina de Feijóo a Madrid para liderar o PP nacional converteu a Rueda no sexto mandatario da Galicia autonómica pola vía rápida, nunha substitución exprés sen gran ruído interno, case cirúrxico, como afai facer o PPdeG cando a necesidade obriga. O novo presidente púxose a traballar cunha liña máis ben continuista, apenas vernizada cun toque persoal que co tempo acabaría sendo bautizado como estilo Rueda.
A política galega entrou entón nunha fase de certa tregua, por momentos case anestesiada á espera de que o calendario achegase as eleccións. Foron meses de tenteo que lle viñeron moi ben ao novo presidente da Xunta para consolidarse, con medidas sociais efectistas e unha amplísima axenda que lle permitiu darse a coñecer máis entre os galegos.
Enfronte, a oposición subestimouno. Non á maquinaria electoral do PPdeG, pero en certa medida si ao seu candidato, ao que chegaron a desprezar politicamente como presidente suplente. Con todo, Rueda demostrou que máis dunha década na sala de máquinas do partido e no Consello da Xunta, se se aproveitan ben, permiten tecer unha importante rede política da que botar man cando se necesita.
No seu caso, calibrou o seu potencial nas municipais de hai un ano con bo resultado. Entón, engrasó a maquinaria electoral, axustou algunhas pezas e lanzouse a por a Xunta o 18-F. O mal momento do PSOE e a súa sucursal galega, a desintegración do rupturismo e o bo ollo político para aproveitar ao seu favor a polarización PP-BNG fixeron o resto.
Hoxe, dous anos despois, un 13 de maio, mentres Portugal celebra entusiasmado a aparición da Virxe a tres pastores en Fátima, na política galega acabouse o tempo do tenteo e a incerteza. E aínda que algúns aínda dubidan, xa non o fan da figura de Rueda, senón do éxito electoral do PPDEG. Porque é case máis milagroso que o da Virxe en Fátima.