A UEFA abre expediente disciplinario a Sergio Ramos pola súa amoestación

O Comité de Disciplina da UEFA comunicou a apertura dun procedemento disciplinario ao defensa madridista Sergio Ramos por recibir "un cartón amarelo á mantenta", no partido disputado polo Real Madrid ante o Ajax, en Amsterdam, o último 13 de febreiro, da ida dos oitavos de final da liga de Campións.

A UEFA, o 14 de febreiro, xa anunciara abrir unha investigación disciplinaria a Sergio Ramos, polas declaracións realizadas tras o partido ante o Ajax, nas que recoñecía forzar un cartón amarelo.

Tras o encontro disputado no Johan Cruyff Area, Sergio Ramos recoñeceu ante os medios de comunicación que forzara o cartón amarelo para cumprir o ciclo de sanción, non xogar o partido de volta ante o conxunto holandés e afrontar sen amoestación algunha os cuartos de final da liga de Campións, se o Real Madrid se clasifica.

"Non che vou mentir e vendo o resultado mentiría se dixese que non é algo que tiña presente. Non é por subestimar ao rival nin penar que a eliminatoria se pasou. Pero no fútbol toca tomar decisións complicadas", dixo o xogador do Real Madrid tras o partido de Amsterdam.

Posteriormente, o capitán do conxunto branco intentou matizar ante outros medios de comunicación e nas redes sociais.

Agora, este martes, a UEFA informou a apertura do procedemento disciplinario a Sergio Ramos, acusado de recibir "un cartón amarelo adrede".

O caso, indicouse, será tratado pola Comisión de Control, Ética e Disciplina da UEFA este próximo xoves, 28 de febreiro.

Por outra banda, a UEFA tamén informou a apertura dun expediente disciplinario ao Barcelona, por organización "insuficiente" no partido disputado no seu campo fronte ao Tottenham Hotspur, o último 11 de decembro de 2018, correspondente á fase de grupos da liga de Campións.

Segundo se indicou, a apertura do expediente disciplinario ao Barcelona foi determinada tras unha queixa presentada polo propio Tottenham e unha investigación disciplinaria realizada polo departamento de Ética e Disciplina da UEFA, de conformidade co artigo 55 do Regulamento Disciplinario.

A decisión respecto diso será tratada polo organismo de Control, Ética e Disciplina da UEFA na súa reunión do 29 do próximo marzo.