O Consello de Ministros aprobou este martes unha modificación do regulamento sobre cotización co fin de dar soporte á cota de solidariedade que se introducirá a partir do próximo ano para os salarios máis elevados, os que superan a base máxima de cotización, que este ano se sitúa en 4.720,50 euros mensuais ou, o que é o mesmo, 56.646 euros anuais. Hoxe, aqueles profesionais cuxos ingresos se encadran nestas cifras pagan á Seguridade Social o mesmo que aqueles con nóminas superiores. É o resultado de que a base máxima de cotización estea topada.
Para darnos unha idea do impacto, tomando como referencia a estatística de mercado de traballo da Axencia Tributaria, en 2022 algo máis dun millón de asalariados —34.600 en Galicia— superarían os 56.000 euros.
O ministerio que dirixe Elma Saiz introducirá unha cota de ao redor do 1% o próximo ano ata alcanzar gradualmente unha cotización extra do 6% para as retribucións máis elevadas en 2045. A finalidade é que estes profesionais por conta allea —os autónomos teñen a transición en curso cara ao sistema de cotización por ingresos reais— contribúan a financiar o sistema de pensións, que en marzo encadeou outro récord de gasto ao esixir un desembolso de 12.693,1 millóns.
A cota de solidariedade forma parte da reforma das pensións en marzo de 2023, que inclúe, ademais, o incremento progresivo das bases máximas de cotización nun 1,2% anual entre 2024 e 2050, unha medida que este ano propiciou unha subida total do 5% ao ter que sumar o 3,8% da revalorización das pensións.
¿Como funcionará a cota adicional de solidariedade?
Gravará o exceso de retribucións do traballador por enriba da base máxima de cotización que se fixe para cada ano. En 2045, a idea é que a cota sexa do 5,5% para a parte do soldo comprendida entre a base máxima e un 10% máis; do 6% no tramo seguinte, isto é, o que abarca entre o 10% superior á base máxima e o 50%, e do 7% por enriba dese nivel.
Empresario e traballador cubrirán o seu custo na mesma proporción que a distribución do tipo de cotización por continxencias comúns. O próximo ano, o tipo será do 0,92% no primeiro tramo, do 1% no segundo e do 1,17% no terceiro.
