A xuíza Pilar de Lara pechou a instrución do caso Garañón in extremis: a véspera de que o Consello Xeral do Poder Xudicial estude a súa posible sanción por atrasos e desatención en varias causas.
De Lara deu por finalizada a instrución sobre posibles irregularidades na polémica urbanización do Garañón, nas costas do Parque de Rosalía de Lugo, e propuxo que senten no banco once investigados. Entre eles figuran o exalcalde José López Orozco, por supostos delitos de prevaricación, tráfico de influencias e falsidade documental, e o expresidente da Deputación e o anterior líder do PSdeG, José Ramón Gómez Besteiro, que aos delitos antes sinalados suma outros tres de suborno pasivo, un de branqueo de capitais e outro de negociación prohibida e abuso da función pública.
De Lara, que comunicou o auto xusto un día antes de que o pleno do CGPJ estude a súa sanción e posible suspensión por sete meses, cre que tamén hai indicios delitivos contra outros tres funcionarios das áreas de urbanismo e licenzas do Concello. Así mesmo, inclúe ao promotor do Garañón, Ricardo Iglesias Paredes, e ao avogado deste durante a negociación de convenio, así como a dous construtores lucenses.
Tamén considera que cometeron delitos, neste caso na compravenda do sanatorio Portela por parte do Instituto Nacional de Estadística, dúas altas funcionarias deste organismo, a súa secretaria xeral Natividade Domínguez e a xefa de área Pilar Rocasalbas.
A maior parte dos letrados das partes investigadas xa anunciaron que recorrerán este auto de transformación en procedemento abreviado. E, en todo caso, hai que recordar que ao final será a Fiscalía a que decida a quen acusa e de que delitos.
