O Partido Socialista de Ourense denunciou que o vicesecretario da Deputación determinou nun informe que o Concello de Beade, liderado polo popular Senén Pousa, incumpre de forma "reiterada e deliberadamente" a Lei de Memoria Histórica, ao manter a rúa Caudillo que honra ao ditador Francisco Franco.
No informe ao que fai referencia o PSdeG, o funcionario conclúe que a "denominación dunha rúa municipal como 'Rúa do Caudillo'" incumpre a lei por tratarse "dunha mención conmemorativa de exaltación da sublevación militar, da Guerra Civil e da represión da ditadura".
Ante estes feitos, os socialistas denuncian a "complicidade" de Manuel Baltar, presidente da Deputación, "ao aplaudir e manter, como presidente do PP no seu partido, a un alcalde franquista insurrecto que incumpre a lei á mantenta".
O informe do funcionario indica que a obrigación de retirada de símbolos ou mencións conmemorativos da exaltación da sublevación militar, da Guerra Civil ou a represión da ditadura é unha "obriga legal" e "regulada", xa que logo, "non é nin graciable nin discrecional, polo que debería ser o propio Concello, de oficio, o que proceda ao seu cumprimento".
Tamén indica que se podería aplicar un procedemento xudicial contra o Concello mediante a "impugnación dunha inactividade administrativa".
O alto funcionario destaca que "esta lei establece un mandato preciso, claro e determinado" para as administracións públicas, incluídos os concellos.
Ante isto, a portavoz provincial dos socialistas, Elvira Lama, acusou a Baltar de ser "aínda máis cómplice e cooperador necesario desta patada á democracia" "ante as sonoras e claras conclusións do vicesecretario da Deputación de Ourense" e censúralle que manteña no seu partido a un alcalde que "presume dunha ditadura asasina e que incumpre a lei á mantenta".
É máis, os socialistas acusan ao PP de Ourense de regar "ao alcalde de Beade con decenas de miles de euros públicos, en lugar de esixirlle que, dunha vez por todas, ou cumpra as leis democráticas ou se poña fóra do Partido Popular".
"Se o PP gaña as eleccións locais en Beade farao grazas ao abrazo de Baltar, presidente do PP ourensán, aos fascistas insurrectos que non cumpren a lei", remarcou.
O documento responde as alegacións do PSdeG para retirar a subvención concedida á reforma da rúa dentro do plan de obras da Deputación, aplicándolle un artigo da Lei de Memoria Histórica. Con todo, o vicesecretario conclúe neste aspecto que a inclusión da obra cumpre todos os requisitos esixidos.
