O catedrático de Microbioloxía Julio Abalde foi reelixido reitor da Universidade da Coruña (UDC) nas eleccións celebradas este mércores, nas que obtivo 3.197 votos, o 70,15%, fronte aos 1.429 apoios (29,85%) do outro aspirante, Fernando Martínez Abella.
Julio Abalde, candidato de Nova Loce, recibiu 1.569 votos do profesorado doutor con vinculación permanente; 438 do resto de profesorado docente e investigador; 905 do estudiantado, e 285 do persoal de administración e servizos. Mentres, Martínez Abella obtivo 790 votos do profesorado doutor con vinculación permanente; 117 do resto de PDI; 391 do estudiantado, e 131 do PAS.
En total, votaron 4.626 persoas, e houbo 146 votos en branco. Así as cousas, a participación foi do 26,16%. No colectivo de alumnos foi do 18,32% (por baixo do 27% de hai catro anos), pero maior que o 10% habitual nas universidades españolas. A participación ascendeu ao 86,60% no sector do profesorado doutor con vinculación permanente; ao 69,81% entre o resto de persoal docente e investigador e ao 79,03% no persoal de Administración e Servizos.
Abalde aposta por mellorar condicións laborais e prestar atención ao estudantado con problemas económicos
"Non houbo ningún problema ao longo da xornada, non caeu ningún servidor. Todo o que quixo votar, puido facelo nun sistema moi seguro que garante a confidencialidade", apuntou o secretario xeral da UDC Carlos Aymerich no reitorado tras o escrutinio.
Pola súa banda, Julio Abalde transmitiu o seu agradecemento "a todos os sectores" por darlle "un magnífico resultado que certifica que o labor do equipo de goberno é recoñecido por toda a universidade". "Esta é unha vitoria colectiva, dun goberno aberto e participativo que propicia o debate", dixo o reitor. A partir de aí, asegurou que nos próximos catro anos, o seu último mandato, a súa prioridade seguirá sendo a "defensa do ensino público galega e de calidade".
Así, subliñou que pretende "mellorar as condicións laborais", seguir prestando atención ao estudantado, "dun modo preferente aos que teñen problemas económicos", e poñer no centro a transparencia, a sustentabilidade e a loita pola igualdade.
Un total de 18.245 persoas da comunidade universitaria estaban convocadas este mércores a participar no proceso electoral. O sistema de voto ponderado concede o 51% ao sector do profesorado doutor con vinculación permanente; o 12% ao resto de persoal docente e investigador; o 28% para o estudantado e o 9% corresponde ao persoal de administración e servizos.
