A sociedade mixta Recursos de Galicia, impulsada pola Xunta —que ostenta o 30% do capital— e 32 empresas galegas para participar no despregamento de novos proxectos de enerxía renovable e ligados á minería co obxectivo de que os beneficios repercutan nas áreas de implantación, porá en marcha unha comercializadora propia "a inicios de 2025".
Avanzouno este domingo o presidente da Xunta desde Sober, onde Alfonso Rueda se recluíu xunto aos seus 12 conselleiros para repasar as liñas estratéxicas de cada departamento.
Nunha comparecencia ante os medios, o pontevedrés anunciou o que considera supón "un paso transcendental" para que "os sectores estratéxicos da economía galega e tamén os veciños" das zonas próximas a parques eólicos e outras instalacións de produción de enerxía renovable poidan dispoñer de enerxía barata e de orixe limpa.
Así as cousas, a nova comercializadora, que comezará a operar a inicios do próximo ano, venderá enerxía "100% renovable, de xeito estable e a un prezo substancialmente por debaixo do mercado, sensiblemente máis barato", en palabras de Rueda.
Como mostra de que o seu Goberno "cumpre con Galicia", tamén adiantou que o 8 de outubro comparecerá no Parlamento para expoñer as liñas estratéxicas da lexislatura.
En canto aos orzamentos autonómicos para 2025, serán remitidos ao Parlamento galego para a súa tramitación e aprobación antes de que acabe outubro, co fin de que a comunidade "volva ter unhas contas o 1 de xaneiro para seguir traballando".
"É o compromiso que temos cos galegos. O estilo Galicia, Traballar dende a planificación, a concordia, a unión e ou sentidiño", manifestou rodeado dos conselleiros nas dependencias do Palacio de Sober.
Rueda: "Galicia non vai renunciar a proxectos que sexan viables e sustentables"
Fronte ás voces contrarias á implantación do proxecto de Altri en Palas de Rei, Rueda reeditou a súa aposta pola colaboración público-privada e mostrouse contundente ao advertir que "Galicia non vai renunciar a proxectos que sexan viables, sustentables e que cumpran coa normativa" en relación co "respecto ao medio ambiente".
Así, apostou por vencer "a oposición dos que sempre están no non permanente”.
