Co gancho de obter liquidez "en 24 horas" pondo simplemente o coche "como aval", máis de 2.000 galegos poderían estar "afectados" polos préstamos outorgados por entidades como Flexicar, Cash4far, Ibancar, Gedescoche, Creditio ou Rankia. O cálculo faio o bufete Caruncho&Tomé, que apunta que son varias as audiencias provinciais que están a declarar a nulidade destes contratos por ser "contrarios á lei".
O despacho afirma presentar "un goteo constante de demandas" nos últimos meses.
¿En que consisten estes créditos?
Publicitados con mensaxes como 'Liquidez en 24 horas co teu coche como aval. ¡E séguelo conducindo!' ou 'Préstamos con garantía de coche sen deixar o coche', os xuristas sinalan que se trata de préstamos "encubertos" mediante os cales o propietario dun vehículo obtén o financiamento "sen decatarse" de que entrega ao prestamista a titularidade do seu turismo.
O bufete sostén que se trata dunha "venda simulada". Con contías que van ata os 35.000 euros, estes créditos outórganse de forma "inmediata", sen que medie un notario e sen analizar se o solicitante está incluído en rexistros de morosos como os de Asnef, Ray, Equifax ou Experian.
Basta con presentar o coche como aval. Primeiro, transfírese a titularidade á entidade prestamista e, logo, rubrícase un contrato de aluguer do vehículo con opción a compra a través do cal o propietario orixinal pode seguir utilizándoo mediante o pago dunha cota mensual.
Caruncho&Tomé advirte que o importe que se obtén prestado "adoita ser moi inferior ao do prezo de mercado" do coche.
O problema chega cando se incorre na primeira falta de pagamento
O problema destápase cando o prestatario incorre nunha falta de pagamento. O socio director do despacho, Carlos Tomé, explica que o contrato queda "resolto", o que implica perder a propiedade do automóbil "de forma definitiva". "Estas empresas válense das necesidades económicas dos consumidores para enganalos e que subscriban compravendas do seu propio vehículo a cambio dun préstamo no que o importe que devolverán será moi superior ao que lles foi prestado", indica o letrado.
