Novo fito na historia de Hijos de Rivera. A súa familia de cervexas crece cunha terceira marca. Estrella Galicia –a primoxénita, coa que comezou a súa andaina fai 118 anos– e 1906 –lanzada fai algo máis de tres décadas– teñen unha nova irmá.
A compañía galega bautizouna como Lupia, un nome que ten moito que ver co seu gran elemento diferencial: elabórase con lúpulo cento por cento galego, procedente dos campos nos que, desde fai 20 anos, florece o proxecto impulsado pola empresa para recuperar o cultivo desta planta trepadora cuxa flor é a encargada de achegar á cervexa o seu peculiar amargor.
O grupo escribe así un novo capítulo na súa traxectoria, co lanzamento ao mercado dunha nova referencia coa que, máis que reforzar o seu negocio desde o punto de vista económico, busca alimentar o seu propósito de xerar un impacto positivo na contorna.
De feito, non suporá nin o 1% das súas vendas, pois a dispoñibilidade de lúpulo de colleita propia é limitada, pero permitirálle marcar a diferenza e crear unha nova categoría de cervexa no mercado nacional. "Dar unha puñada na mesa e dicir o que somos", así foi como sintetizou este xoves o presidente executivo, Ignacio Rivera, a razón do que é o seu segundo lanzamento.
Dúas receitas e dous formatos
O volume de cervexa Lupia que chegará ao consumidor dependerá de como vaia cada ano a colleita. A primeira tirada constará de dúas receitas: unha cervexa coa variedade de lúpulo nugget, cun perfil máis terroso, herbáceo e picante, e outra coa variedade magnum, con toques máis florais e afrutados e un ton cítrico.
"É un cervezón", afirmou Rivera na presentación da nova marca. Lupia chegará á hostalería en formato botella mentres na canle da alimentación poderase atopar en lata –a versión magnum só estará dispoñible en lata–.
