O sector turístico encara o verán con boas perspectivas en Galicia tras rexistrar un récord de pernoctacións e viaxeiros entre xaneiro e maio. Segundo o Instituto Nacional de Estadística (Ine), hoteis, cámpings, apartamentos turísticos, aloxamentos de turismo rural e albergues sumaron máis de 3,54 millóns de estancias, unha cifra sen parangón que supón un incremento do 2% en relación cos primeiros cinco meses de 2023.
En total, 2,14 millóns de viaxeiros elixiron a comunidade para pasar uns días, unha cifra que reflicte unha repunta do 5% en termos interanuais e que Turismo de Galicia celebra ao considerar que a radiografía indica que Galicia "avanza na desestacionalización" do sector.
Os meses con máis turistas
Con todo, cunha lectura máis pormenorizada dos datos obsérvase que non todos os meses foron igual de favorables no que toca á afluencia de viaxeiros.
Do balance mensual extráese que a chegada de turistas intensificouse sobre todo en maio, cando despuntou un 15%, coincidindo coas pontes do Día Internacional dos Traballadores, a Ascensión e as Letras Galegas. O mesmo sucedeu en marzo co efecto da Semana Santa, que auspiciou unha repunta dos viaxeiros do 29%, que seguiu ao avance de tres puntos que se deu en febreiro co Entroido como gancho.
Con todo, xaneiro e sobre todo abril —sen festivos no calendario— foron meses negativos.
Á parte de que aínda queda camiño por percorrer na desestacionalización do turismo, outro dos retos pendentes é aumentar os ingresos dos aloxamentos, o que pasa por elevar a estancia media, que en maio foi de 1,55 noites para o conxunto do sector en Galicia.
Trátase do cociente máis reducido entre todas as autonomías e queda a medio camiño no que toca á referencia estatal, de 3,12 noites.
Beneficiada polo seu clima e modelo turístico de praia, Canarias é a comunidade que leva maior vantaxe no conxunto do Estado, pois as estatísticas indican que, de media, un viaxeiro pasa alí 6,36 noites. Por detrás sitúanse Baleares, con 4,47 e Valencia (3,59).
¿Que tipo de establecementos rexistraron maior demanda?
Aínda que en termos absolutos o 76% dos viaxeiros que recalaron en Galicia decantouse por un hotel, uns establecementos que deron acubillo a 1,6 millóns de visitantes —un 6,7% máis que no mesmo período de 2023—, o maior incremento en termos relativos foi o que experimentaron os cámpings, que recibiron a 39.233 turistas, un 31,8% máis a pesar dos vaivéns meteorolóxicos.
O auxe das caravanas e a procura dunha opción de descanso máis económica pode estar detrás deste repunta. No entanto, en Galicia esta modalidade está lonxe das cifras que presenta Cataluña, o destino de catro de cada dez campistas.
Co tirón do Camiño de Santiago, o forte da comunidade son os albergues, un campo no que Galicia leva a dianteira. Nos cinco primeiros meses do ano recibiron a 348.187 viaxeiros, o 20% dos 1,78 millóns que recalaron nalgún aloxamento deste tipo no conxunto do Estado.
Con Galicia situada como oitavo destino turístico do Estado e ante unha radiografía que revela que a chegada de estranxeiros creceu un 17% no último ano, con 823.373 viaxeiros ata maio —o que elevou o seu peso sobre o total do 34 ao 38%—, o presidente da Xunta destacou este martes que a comunidade "está máis de moda ca nunca", aínda que incidiu en que o "sentidiño" debe presidir a atracción de viaxeiros.
Foi durante unha visita a Sanxenxo, onde augurou que o verán será "excepcional" e deixará rexistros de "récord". "Facendo as cousas ordenadamente, cabemos todos", manifestou.
Durmir nun hotel galego costa a metade que en Madrid
A radiografía que traza o Ine revela que en maio a facturación media diaria dos establecementos hostaleiros ascendeu a 70,6 euros en Galicia tras experimentar unha repunta do 5% en termos interanuais. De media, o sector ten unhas tarifas un 53% máis económicas que Madrid, que presenta os prezos máis elevados ao rozar a noite os 151 euros ao reflectir un encarecemento do 20% no último ano.
